Ramaraksha Stotram

अस्य श्रीरामरक्षास्तोत्रमन्त्रस्य । बुधकौशिक ऋषिः । श्रीसीतारामचन्द्रो देवता । अनुष्टुप् छन्दः । सीता शक्तिः । श्रीमद् हनुमान कीलकम् । श्रीरामचन्द्रप्रीत्यर्थे रामरक्षास्तोत्रजपे विनियोगः ॥

asya śrīrāmarakṣāstotramantrasya | budhakauśika ṛṣiḥ | śrīsītārāmacandro devatā | anuṣṭup chandaḥ | sītā śaktiḥ | śrīmad hanumāna kīlakam | śrīrāmacandraprītyarthe rāmarakṣāstotrajape viniyogaḥ ||

ध्यायेदाजानुबाहुं धृतशरधनुषं बद्धपद्मासनस्थं पीतं वासो वसानं नवकमलदलस्पर्धिनेत्रं प्रसन्नम् । वामाङ्कारूढ सीतामुखकमलमिलल्लोचनं नीरदाभं नानालङ्कारदीप्तं दधतमुरुजटामण्डनं रामचन्द्रम् ॥

dhyāyedājānubāhuṃ dhṛtaśaradhanuṣaṃ baddhapadmāsanasthaṃ pītaṃ vāso vasānaṃ navakamaladalaspardhinetraṃ prasannam | vāmāṅkārūḍha sītāmukhakamalamilallocanaṃ nīradābhaṃ nānālaṅkāradīptaṃ dadhatamurujaṭāmaṇḍanaṃ rāmacandram ||

चरितं रघुनाथस्य शतकोटि प्रविस्तरम् । एकैकमक्षरं पुंसां महापातकनाशनम् ॥

caritaṃ raghunāthasya śatakoṭi pravistaram | ekaikamakṣaraṃ puṃsāṃ mahāpātakanāśanam ||

ध्यात्वा नीलोत्पलश्यामं रामं राजीवलोचनम् । जानकीलक्ष्मणोपेतं जटामुकुटमण्डितम् ॥

dhyātvā nīlotpalaśyāmaṃ rāmaṃ rājīvalocanam | jānakīlakṣmaṇopetaṃ jaṭāmukuṭamaṇḍitam ||

सासितूणधनुर्बाणपाणिं नक्तञ्चरान्तकम् । स्वलीलया जगत्त्रातुमाविर्भूतमजं विभुम् ॥

sāsitūṇadhanurbāṇapāṇiṃ naktañcarāntakam | svalīlayā jagattrātumāvirbhūtamajaṃ vibhum ||

रामरक्षां पठेत्प्राज्ञः पापघ्नीं सर्वकामदाम् । शिरो मे राघवः पातु भालं दशरथात्मजः ॥

rāmarakṣāṃ paṭhetprājñaḥ pāpaghnīṃ sarvakāmadām | śiro me rāghavaḥ pātu bhālaṃ daśarathātmajaḥ ||

कौसल्येयो दृशौ पातु विश्वामित्रप्रियः श्रुती । घ्राणं पातु मखत्राता मुखं सौमित्रिवत्सलः ॥

kausalyeyo dṛśau pātu viśvāmitrapriyaḥ śrutī | ghrāṇaṃ pātu makhatrātā mukhaṃ saumitrivatsalaḥ ||

जिह्वां विद्यानिधिः पातु कण्ठं भरतवन्दितः । स्कन्धौ दिव्यायुधः पातु भुजौ भग्नेशकार्मुकः ॥

jihvāṃ vidyānidhiḥ pātu kaṇṭhaṃ bharatavanditaḥ | skandhau divyāyudhaḥ pātu bhujau bhagneśakārmukaḥ ||

करौ सीतापतिः पातु हृदयं जामदग्न्यजित् । मध्यं पातु खरध्वंसी नाभिं जाम्बवदाश्रयः ॥

karau sītāpatiḥ pātu hṛdayaṃ jāmadagnyajit | madhyaṃ pātu kharadhvaṃsī nābhiṃ jāmbavadāśrayaḥ ||

सुग्रीवेशः कटी पातु सक्थिनी हनुमत्प्रभुः । ऊरू रघूत्तमः पातु रक्षःकुलविनाशकृत् ॥

sugrīveśaḥ kaṭī pātu sakthinī hanumatprabhuḥ | ūrū raghūttamaḥ pātu rakṣaḥkulavināśakṛt ||

जानुनी सेतुकृत्पातु जङ्घे दशमुखान्तकः । पादौ बिभीषणश्रीदः पातु रामोऽखिलं वपुः ॥

jānunī setukṛtpātu jaṅghe daśamukhāntakaḥ | pādau bibhīṣaṇaśrīdaḥ pātu rāmo'khilaṃ vapuḥ ||

एतां रामबलोपेतां रक्षां यः सुकृती पठेत् । स चिरायुः सुखी पुत्री विजयी विनयी भवेत् ॥

etāṃ rāmabalopetāṃ rakṣāṃ yaḥ sukṛtī paṭhet | sa cirāyuḥ sukhī putrī vijayī vinayī bhavet ||

पातालभूतलव्योमचारिणश्छद्मचारिणः । न द्रष्टुमपि शक्तास्ते रक्षितं रामनामभिः ॥

pātālabhūtalavyomacāriṇaśchadmacāriṇaḥ | na draṣṭumapi śaktāste rakṣitaṃ rāmanāmabhiḥ ||

रामेति रामभद्रेति रामचन्द्रेति वा स्मरन् । नरो न लिप्यते पापैर्भुक्तिं मुक्तिं च विन्दति ॥

rāmeti rāmabhadreti rāmacandreti vā smaran | naro na lipyate pāpairbhuktiṃ muktiṃ ca vindati ||

जगज्जैत्रैकमन्त्रेण रामनाम्नाभिरक्षितम् । यः कण्ठे धारयेत्तस्य करस्थाः सर्वसिद्धयः ॥

jagajjaitraikamantreṇa rāmanāmnābhirakṣitam | yaḥ kaṇṭhe dhārayettasya karasthāḥ sarvasiddhayaḥ ||

वज्रपञ्जरनामेदं यो रामकवचं स्मरेत् । अव्याहताज्ञः सर्वत्र लभते जयमङ्गलम् ॥

vajrapañjaranāmedaṃ yo rāmakavacaṃ smaret | avyāhatājñaḥ sarvatra labhate jayamaṅgalam ||

आदिष्टवान् यथा स्वप्ने रामरक्षामिमां हरः । तथा लिखितवान् प्रातः प्रबुद्धो बुधकौशिकः ॥

ādiṣṭavān yathā svapne rāmarakṣāmimāṃ haraḥ | tathā likhitavān prātaḥ prabuddho budhakauśikaḥ ||

आरामः कल्पवृक्षाणां विरामः सकलापदाम् । अभिरामस्त्रिलोकानां रामः श्रीमान् स नः प्रभुः ॥

ārāmaḥ kalpavṛkṣāṇāṃ virāmaḥ sakalāpadām | abhirāmastrilokānāṃ rāmaḥ śrīmān sa naḥ prabhuḥ ||

तरुणौ रूपसम्पन्नौ सुकुमारौ महाबलौ । पुण्डरीकविशालाक्षौ चीरकृष्णाजिनाम्बरौ ॥

taruṇau rūpasampannau sukumārau mahābalau | puṇḍarīkaviśālākṣau cīrakṛṣṇājināmbarau ||

फलमूलाशिनौ दान्तौ तापसौ ब्रह्मचारिणौ । पुत्रौ दशरथस्यैतौ भ्रातरौ रामलक्ष्मणौ ॥

phalamūlāśinau dāntau tāpasau brahmacāriṇau | putrau daśarathasyaitau bhrātarau rāmalakṣmaṇau ||

शरण्यौ सर्वसत्त्वानां श्रेष्ठौ सर्वधनुष्मताम् । रक्षः कुलनिहन्तारौ त्रायेतां नो रघूत्तमौ ॥

śaraṇyau sarvasattvānāṃ śreṣṭhau sarvadhanuṣmatām | rakṣaḥ kulanihantārau trāyetāṃ no raghūttamau ||

आत्तसज्जधनुषाविषुस्पृशावक्षयाशुगनिषङ्गसङ्गिनौ । रक्षणाय मम रामलक्ष्मणावग्रतः पथि सदैव गच्छताम् ॥

āttasajjadhanuṣāviṣuspṛśāvakṣayāśuganiṣaṅgasaṅginau | rakṣaṇāya mama rāmalakṣmaṇāvagrataḥ pathi sadaiva gacchatām ||

सन्नद्धः कवची खड्गी चापबाणधरो युवा । गच्छन्मनोरथोऽस्माकं रामः पातु सलक्ष्मणः ॥

sannaddhaḥ kavacī khaḍgī cāpabāṇadharo yuvā | gacchanmanoratho'smākaṃ rāmaḥ pātu salakṣmaṇaḥ ||

रामो दाशरथिः शूरो लक्ष्मणानुचरो बली । काकुत्स्थः पुरुषः पूर्णः कौसल्येयो रघूत्तमः ॥

rāmo dāśarathiḥ śūro lakṣmaṇānucaro balī | kākutsthaḥ puruṣaḥ pūrṇaḥ kausalyeyo raghūttamaḥ ||

वेदान्तवेद्यो यज्ञेशः पुराणपुरुषोत्तमः । जानकीवल्लभः श्रीमानप्रमेयपराक्रमः ॥

vedāntavedyo yajñeśaḥ purāṇapuruṣottamaḥ | jānakīvallabhaḥ śrīmānaprameyaparākramaḥ ||

इत्येतानि जपन्नित्यं मद्भक्तः श्रद्धयान्वितः । अश्वमेधाधिकं पुण्यं सम्प्राप्नोति न संशयः ॥

ityetāni japannityaṃ madbhaktaḥ śraddhayānvitaḥ | aśvamedhādhikaṃ puṇyaṃ samprāpnoti na saṃśayaḥ ||

रामं दूर्वादलश्यामं पद्माक्षं पीतवाससम् । स्तुवन्ति नामभिर्दिव्यैः न ते संसारिणो नराः ॥

rāmaṃ dūrvādalaśyāmaṃ padmākṣaṃ pītavāsasam | stuvanti nāmabhirdivyaiḥ na te saṃsāriṇo narāḥ ||

रामं लक्ष्मणपूर्वजं रघुवरं सीतापतिं सुन्दरम् । काकुत्स्थं करुणार्णवं गुणनिधिं विप्रप्रियं धार्मिकम् । राजेन्द्रं सत्यसन्धं दशरथतनयं श्यामलं शान्तमूर्तिम् । वन्दे लोकाभिरामं रघुकुलतिलकं राघवं रावणारिम् ॥

rāmaṃ lakṣmaṇapūrvajaṃ raghuvaraṃ sītāpatiṃ sundaram | kākutsthaṃ karuṇārṇavaṃ guṇanidhiṃ viprapriyaṃ dhārmikam | rājendraṃ satyasandhaṃ daśarathatanayaṃ śyāmalaṃ śāntamūrtim | vande lokābhirāmaṃ raghukulatilakaṃ rāghavaṃ rāvaṇārim ||

रामाय रामभद्राय रामचन्द्राय वेधसे । रघुनाथाय नाथाय सीतायाः पतये नमः ॥

rāmāya rāmabhadrāya rāmacandrāya vedhase | raghunāthāya nāthāya sītāyāḥ pataye namaḥ ||

श्रीराम राम रघुनन्दन राम राम श्रीराम राम भरताग्रज राम राम । श्रीराम राम रणकर्कश राम राम श्रीराम राम शरणं भव राम राम ॥

śrīrāma rāma raghunandana rāma rāma śrīrāma rāma bharatāgraja rāma rāma | śrīrāma rāma raṇakarkaśa rāma rāma śrīrāma rāma śaraṇaṃ bhava rāma rāma ||

श्रीरामचन्द्रचरणौ मनसा स्मरामि श्रीरामचन्द्रचरणौ वचसा गृणामि । श्रीरामचन्द्रचरणौ शिरसा नमामि श्रीरामचन्द्रचरणौ शरणं प्रपद्ये ॥

śrīrāmacandracaraṇau manasā smarāmi śrīrāmacandracaraṇau vacasā gṛṇāmi | śrīrāmacandracaraṇau śirasā namāmi śrīrāmacandracaraṇau śaraṇaṃ prapadye ||

माता रामो मत्पिता रामचन्द्रः । स्वामी रामो मत्सखा रामचन्द्रः । सर्वस्वं मे रामचन्द्रो दयालुः । नान्यं जाने नैव जाने न जाने ॥

mātā rāmo matpitā rāmacandraḥ | svāmī rāmo matsakhā rāmacandraḥ | sarvasvaṃ me rāmacandro dayāluḥ | nānyaṃ jāne naiva jāne na jāne ||

दक्षिणे लक्ष्मणो यस्य वामे तु जनकात्मजा । पुरतो मारुतिर्यस्य तं वन्दे रघुनन्दनम् ॥

dakṣiṇe lakṣmaṇo yasya vāme tu janakātmajā | purato mārutiryasya taṃ vande raghunandanam ||

लोकाभिरामं रणरङ्गधीरं राजीवनेत्रं रघुवंशनाथम् । कारुण्यरूपं करुणाकरं तं श्रीरामचन्द्रं शरणं प्रपद्ये ॥

lokābhirāmaṃ raṇaraṅgadhīraṃ rājīvanetraṃ raghuvaṃśanātham | kāruṇyarūpaṃ karuṇākaraṃ taṃ śrīrāmacandraṃ śaraṇaṃ prapadye ||

मनोजवं मारुततुल्यवेगं जितेन्द्रियं बुद्धिमतां वरिष्ठम् । वातात्मजं वानरयूथमुख्यं श्रीरामदूतं शरणं प्रपद्ये ॥

manojavaṃ mārutatulyavegaṃ jitendriyaṃ buddhimatāṃ variṣṭham | vātātmajaṃ vānarayūthamukhyaṃ śrīrāmadūtaṃ śaraṇaṃ prapadye ||

कूजन्तं रामरामेति मधुरं मधुराक्षरम् । आरुह्य कविताशाखां वन्दे वाल्मीकिकोकिलम् ॥

kūjantaṃ rāmarāmeti madhuraṃ madhurākṣaram | āruhya kavitāśākhāṃ vande vālmīkikokilam ||

आपदामपहर्तारं दातारं सर्वसम्पदाम् । लोकाभिरामं श्रीरामं भूयो भूयो नमाम्यहम् ॥

āpadāmapahartāraṃ dātāraṃ sarvasampadām | lokābhirāmaṃ śrīrāmaṃ bhūyo bhūyo namāmyaham ||

भर्जनं भवबीजानामर्जनं सुखसम्पदाम् । तर्जनं यमदूतानां रामरामेति गर्जनम् ॥

bharjanaṃ bhavabījānāmarjanaṃ sukhasampadām | tarjanaṃ yamadūtānāṃ rāmarāmeti garjanam ||

रामो राजमणिः सदा विजयते रामं रमेशं भजे रामेणाभिहता निशाचरचमू रामाय तस्मै नमः । रामान्नास्ति परायणं परतरं रामस्य दासोऽस्म्यहं रामे चित्तलयः सदा भवतु मे भो राम मामुद्धर ॥

rāmo rājamaṇiḥ sadā vijayate rāmaṃ rameśaṃ bhaje rāmeṇābhihatā niśācaracamū rāmāya tasmai namaḥ | rāmānnāsti parāyaṇaṃ parataraṃ rāmasya dāso'smyahaṃ rāme cittalayaḥ sadā bhavatu me bho rāma māmuddhara ||

रामरामेति रामेति रमे रामे मनोरमे । सहस्रनामतत्तुल्यं रामनाम वरानने ॥

rāmarāmeti rāmeti rame rāme manorame | sahasranāmatattulyaṃ rāmanāma varānane ||

इति श्रीबुधकौशिकविरचितं श्रीरामरक्षास्तोत्रं सम्पूर्णम् ॥

iti śrībudhakauśikaviracitaṃ śrīrāmarakṣāstotraṃ sampūrṇam ||